UtshovSukta 92
92.1
अ॒भि प्र गोप॑तिं गि॒रेन्द्र॑मर्च॒ यथा॑ वि॒दे। सू॒तुं स॒त्यस्य॒ सत्प॑तिम् ॥१॥
Abhi pra gopatim girendramarcha yatha vide, sutum satyasya satpatim
92.2
आ ह॑रयः ससृज्रि॒रेऽरु॑षी॒रधि॑ ब॒र्हिषि॑ । यत्रा॒भि सं॒नवा॑महे ॥२॥
A harayah sasrijrirerushiradhi barhishi, yatrabhi sannavamahe
92.3
इन्द्रा॑य॒ गाव॑ आ॒शिरं॑ दुदु॒ह्रे व॒ज्रिणे॒ मधु॑ । यत् सी॑मुपह्व॒रे वि॒दत् ॥३॥
Indraya gava ashiram duduhre vajrine madhu, yat simupahvare vidat
92.4
उद् यद् ब्र॒ध्नस्य॑ वि॒ष्टपं॑ गृ॒हमिन्द्र॑श्च॒ गन्व॑हि ।
मध्वः॑ पी॒त्वा स॑चेवहि॒ त्रिः स॒प्त सख्युः॑ प॒दे ॥४॥
Ud yad bradhnasya vishtapam grihamindrashcha ganvahi
Madhvah pitva sachevahi trih sapta sakhyuh pade
92.5
अर्च॑त॒ प्रार्च॑त॒ प्रिय॑मेधासो॒ अर्च॑त । अर्च॑न्तु पुत्र॒का उ॒त पुरं॒ न धृ॒ष्ण्वऽर्चत ॥५॥
Archata prarchata priyamedhaso archata, archantu putraka uta puram na dhrishnvarchata
92.6
अव॑ स्वराति॒ गर्ग॑रो गो॒धा परि॑ सनिष्वणत्।
पिङ्गा॒ परि॑ चनिष्कद॒दिन्द्रा॑य॒ ब्रह्मोद्य॑तम् ॥६॥
Ava svarati gargaro godha pari sanishvanat
Pinga pari chanishkadadindraya brahmodyatam
92.7
आ यत् पत॑न्त्ये॒न्यः सु॒दुघा॒ अन॑पस्फुरः ।
अ॒प॒स्फुरं॑ गृभायत॒ सोम॒मिन्द्रा॑य॒ पात॑वे ॥७॥
A yat patantyenyah sudugha anapasphurah
Apasphuram gribhayata somamindraya patave
92.8
अपा॒दिन्द्रो॒ अपा॑द॒ग्निर्विश्वे॑ दे॒वा अ॑मत्सत ।
वरु॑ण॒ इदि॒ह क्ष॑य॒त् तमापो॑ अ॒भ्यऽनूषत व॒त्सं सं॒शिश्व॑रीरिव ॥८॥
Apadindro apadagnirvishve deva amatsata
Varuna idiha kshayat tamapo abhyanushata vatsam sanshishvaririva
92.9
सु॒दे॒वो अ॑सि वरुण॒ यस्य॑ ते स॒प्त सिन्ध॑वः ।
अ॒नु॒क्षर॑न्ति का॒कुदं॑ सू॒र्यं सुषि॒रामि॑व ॥९॥
Sudevo asi varuna yasya te sapta sindhavah
Anuksharanti kakudam suryam sushiramiva
92.10
यो व्यतीं॒रफा॑णय॒त् सुयु॑क्तां॒ उप॑ दा॒शुषे॑ ।
त॒क्वो ने॒ता तदिद् वपु॑रुप॒मा यो अमु॑च्यत ॥१०॥
Yo vyatinraphanayat suyuktam upa dashushe
Takvo neta tadid vapurupama yo amuchyata
92.11
अतीदु॑ श॒क्र ओ॑हत॒ इन्द्रो॒ विश्वा॒ अति॒ द्विषः॑ ।
भि॒नत् क॒नीन॑ ओद॒नं प॒च्यमा॑नं प॒रो गि॒रा ॥११॥
Atidu shakra ohata indro vishva ati dvishah
Bhinat kanina odanam pachyamanam paro gira
92.12
अ॒र्भ॒को न कु॑मार॒कोऽधि॑ तिष्ठ॒न्नवं॒ रथ॑म्।
स प॑क्षन्महि॒षं मृ॒गं पि॒त्रे मा॒त्रे वि॑भु॒क्रतु॑म् ॥१२॥
Arbhako na kumarakodhi tishthannavam ratham
Sa pakshanmahisham mrigam pitre matre vibhukratum
92.13
आ तू सु॑शिप्र दंपते॒ रथं॑ तिष्ठा हिर॒ण्यय॑म्।
अध॑ द्यु॒क्षं स॑चेवहि स॒हस्र॑पादमरु॒षं स्व॑स्ति॒गाम॑ने॒हस॑म् ॥१३॥
A tu sushipra dampate ratham tishtha hiranyayam
Adha dyuksham sachevahi sahasrapadamarusham svastigamanehasam
92.14
तं घे॑मि॒त्था न॑म॒स्विन॒ उप॑ स्व॒राज॑मासते ।
अर्थं॑ चिदस्य॒ सुधि॑तं॒ यदेत॑व आव॒र्तय॑न्ति दा॒वने॑ ॥१४॥
Tam ghemittha namasvina upa svarajamasate
Artham chidasya sudhitam yadetava avartayanti davane
92.15
अनु॑ प्र॒त्नस्यौक॑सः प्रि॒यमे॑धास एषाम्।
पूर्वा॒मनु॒ प्रय॑तिं वृ॒क्तब॑र्हिषो हि॒तप्र॑यस आशत ॥१५॥
Anu pratnasyaukasah priyamedhasa esham
Purvamanu prayatim vriktabarhisho hitaprayasa ashata
92.16
यो राजा॑ चर्षणी॒नां याता॒ रथे॑भि॒रध्रि॑गुः ।
विश्वा॑सां तरु॒ता पृत॑नानां॒ ज्येष्ठो॒ यो वृ॑त्र॒हा गृ॒णे ॥१६॥
Yo raja charshaninam yata rathebhiradhriguh
Vishvasam taruta pritananam jyeshtho yo vritraha grine
92.17
इन्द्रं॒ तं शु॑म्भ पुरुहन्म॒न्नव॑से॒ यस्य॑ द्वि॒ता वि॑ध॒र्तरि॑ ।
हस्ता॑य॒ वज्रः॒ प्रति॑ धायि दर्श॒तो म॒हो दि॒वे न सूर्यः॑ ॥१७॥
Indram tam shumbha puruhanmannavase yasya dvita vidhartari
Hastaya vajrah prati dhayi darshato maho dive na suryah
92.18
नकि॒ष्टं कर्म॑णा नश॒द् यश्च॒कार॑ स॒दावृ॑धम्।
इन्द्रं॒ न य॒ज्ञैर्वि॒श्वगू॑र्त॒मृभ्व॑स॒मधृ॑ष्टं धृ॒ष्ण्वोऽजसम् ॥१८॥
Nakishtam karmana nashad yashchakara sadavridham
Indram na yagyairvishvagurtamribhvasamadhrishtam dhrishnvojasam
92.19
अषा॑ल्हमु॒ग्रं पृत॑नासु सास॒हिं यस्मि॑न् म॒हीरु॑रु॒ज्रयः॑ ।
सं धे॒नवो॒ जाय॑माने अनोनवु॒र्द्यावः॒ क्षामो॑ अनोनवुः ॥१९॥
Ashalhamugram pritanasu sasahim yasmin mahirurujrayah
Sam dhenavo jayamane anonavurdyavah kshamo anonavuh
92.20
यद् द्याव॑ इन्द्र ते श॒तं श॒तं भूमी॑रु॒त स्युः ।
न त्वा॑ वज्रिन्त्स॒हस्रं॒ सूर्या॒ अनु॒ न जा॒तम॑ष्ट॒ रोद॑सी ॥२०॥
Yad dyava indra te shatam shatam bhumiruta syuh
Na tva vajrintsahasram surya anu na jatamashta rodasi
92.21
आ प॑प्राथ महि॒ना वृष्ण्या॑ वृष॒न् विश्वा॑ शविष्ठ॒ शव॑सा ।
अ॒स्मां अ॑व मघव॒न् गोम॑ति व्र॒जे वज्रिं॑ चि॒त्राभि॑रू॒तिभिः॑ ॥२१॥
A papratha mahina vrishnya vrishan vishva shavishtha shavasa
Asmam ava maghavan gomati vraje vajrim chitrabhirutibhih