UtshovSukta 35
35.1
अ॒स्मा इदु॒ प्र त॒वसे॑ तु॒राय॒ प्रयो॒ न ह॑र्मि॒ स्तोमं॒ माहि॑नाय ।
ऋची॑षमा॒याध्रि॑गव॒ ओह॒मिन्द्रा॑य॒ ब्रह्मा॑णि रा॒तत॑मा ॥१॥
Asma idu pra tavase turaya prayo na harmi stomam mahinaya
Richishamayadhrigava ohamindraya brahmani ratatama
35.2
अ॒स्मा इदु॒ प्रय॑ इव॒ प्र यं॑सि॒ भरा॑म्याङ्गू॒षं बाधे॑ सुवृ॒क्ति।
इन्द्रा॑य हृ॒दा मन॑सा मनी॒षा प्र॒त्नाय॒ पत्ये॒ धियो॑ मर्जयन्त ॥२॥
Asma idu praya iva pra yansi bharamyangusham badhe suvrikti
Indraya hrida manasa manisha pratnaya patye dhiyo marjayanta
35.3
अ॒स्मा इदु॒ त्यमु॑प॒मं स्व॒र्षां भरा॑म्याङ्गू॒षमा॒स्येऽन ।
मंहि॑ष्ठ॒मच्छो॑क्तिभिर्मती॒नां सु॑वृ॒क्तिभिः॑ सू॒रिं वा॑वृ॒धध्यै॑ ॥३॥
Asma idu tyamupamam svarsham bharamyangushamasyena
Manhishthamachchhoktibhirmatinam suvriktibhih surim vavridhadhyai
35.4
अ॒स्मा इदु॒ स्तोमं॒ सं हि॑नोमि॒ रथं॒ न तष्टे॑व॒ तत्सि॑नाय ।
गिर॑श्च॒ गिर्वा॑हसे सुवृ॒क्तीन्द्रा॑य विश्वमि॒न्वं मेधि॑राय ॥४॥
Asma idu stomam sam hinomi ratham na tashteva tatsinaya
Girashcha girvahase suvriktindraya vishvaminvam medhiraya
35.5
अ॒स्मा इदु॒ सप्ति॑मिव श्रव॒स्येन्द्रा॑या॒र्कं जु॒ह्वा॒३सम॑ञ्जे ।
वी॒रं दा॒नौक॑सं व॒न्दध्यै॑ पु॒रां गू॒र्तश्र॑वसं द॒र्माण॑म् ॥५॥
Asma idu saptimiva shravasyendrayarkam juhva3samanje
Viram danaukasam vandadhyai puram gurtashravasam darmanam
35.6
अ॒स्मा इदु॒ त्वष्टा॑ तक्ष॒द् वज्रं॒ स्वप॑स्तमं स्व॒र्यं॑१ रणा॑य ।
वृ॒त्रस्य॑ चिद् वि॒दद् येन॒ मर्म॑ तु॒जन्नीशा॑नस्तुज॒ता कि॑ये॒धाः ॥६॥
Asma idu tvashta takshad vajram svapastamam svaryan1 ranaya
Vritrasya chid vidad yena marma tujannishanastujata kiyedhah
35.7
अ॒स्येदु॑ मा॒तुः सव॑नेषु स॒द्यो म॒हः पि॒तुं प॑पि॒वां चार्वन्ना॑ ।
मु॒षा॒यद् विष्णुः॑ पच॒तं सही॑या॒न् विध्य॑द् वरा॒हं ति॒रो अद्रि॒मस्ता॑ ॥७॥
Asyedu matuh savaneshu sadyo mahah pitum papivam charvanna
Mushayad vishnuh pachatam sahiyan vidhyad varaham tiro adrimasta
35.8
अ॒स्मा इदु॒ ग्नाश्चि॑द् दे॒वप॑त्नी॒रिन्द्रा॑या॒र्कम॑हि॒हत्य॑ ऊवुः ।
परि॒ द्यावा॑पृथि॒वी ज॑भ्र उ॒र्वी नास्य॒ ते म॑हि॒मानं॒ परि॑ ष्टः ॥८॥
Asma idu gnashchid devapatnirindrayarkamahihatya uvuh
Pari dyavaprithivi jabhra urvi nasya te mahimanam pari shtah
35.9
अ॒स्ये दे॒व प्र रि॑रिचे महि॒त्वं दि॒वस्पृ॑थि॒व्याः पर्य॒न्तरि॑क्षात्।
स्व॒रालिन्द्रो॒ दम॒ आ वि॒श्वगू॑र्तः स्व॒रिरम॑त्रो ववक्षे॒ रणा॑य ॥९॥
Asye deva pra ririche mahitvam divasprithivyah paryantarikshat
Svaralindro dama a vishvagurtah svariramatro vavakshe ranaya
35.10
अ॒स्येदे॒व शव॑सा शु॒षन्तं॒ वि वृ॑श्च॒द् वज्रे॑ण वृ॒त्रमिन्द्रः॑ ।
गा न व्रा॒णा अ॒वनी॑रमुञ्चद॒भि श्रवो॑ दा॒वने॒ सचे॑ताः ॥१०॥
Asyedeva shavasa shushantam vi vrishchad vajrena vritramindrah
Ga na vrana avaniramunchadabhi shravo davane sachetah
35.11
अ॒स्येदु॑ त्वे॒षसा॑ रन्त॒ सिन्ध॑वः॒ परि॒ यद् वज्रे॑ण सी॒मय॑च्छत्।
ई॒शा॒न॒कृद् दा॒शुषे॑ दश॒स्यन् तु॒र्वीत॑ये गा॒धं तु॒र्वणिः॑ कः ॥११॥
Asyedu tveshasa ranta sindhavah pari yad vajrena simayachchhat
Ishanakrid dashushe dashasyan turvitaye gadham turvanih kah
35.12
अ॒स्मा इदु॒ प्र भ॑रा॒ तूतु॑जानो वृ॒त्राय॒ वज्र॒मीशा॑नः किये॒धाः ।
गोर्न पर्व॒ वि र॑दा तिर॒श्चेष्य॒न्नर्णां॑स्य॒पां च॒रध्यै॑ ॥१२॥
Asma idu pra bhara tutujano vritraya vajramishanah kiyedhah
Gorna parva vi rada tirashcheshyannarnansyapam charadhyai
35.13
अ॒स्येदु॒ प्र ब्रू॑हि पू॒र्व्याणि॑ तु॒रस्य॒ कर्मा॑णि॒ नव्य॑ उ॒क्थैः ।
यु॒धे यदि॑ष्णा॒न आयु॑धान्यृघा॒यमा॑णो निरि॒णाति॒ शत्रू॑न् ॥१३॥
Asyedu pra bruhi purvyani turasya karmani navya ukthaih
Yudhe yadishnana ayudhanyrighayamano nirinati shatrun
35.14
अ॒स्येदु॑ भि॒या गि॒रय॑श्च दृ॒ल्हा द्यावा॑ च॒ भूमा॑ ज॒नुष॑स्तुजेते ।
उपो॑ वे॒नस्य॒ जोगु॑वान ओ॒णिं स॒द्यो भु॑वद् वी॒र्याय नो॒धाः ॥१४॥
Asyedu bhiya girayashcha drilha dyava cha bhuma janushastujete
Upo venasya joguvana onim sadyo bhuvad viryaya nodhah
35.15
अ॒स्मा इदु॒ त्यदनु॑ दाय्येषा॒मेको॒ यद् वव्ने भूरे॒रीशा॑नः ।
प्रैत॑शं॒ सूर्ये॑ पस्पृधा॒नं सौव॑श्व्ये॒ सुष्वि॑माव॒दिन्द्रः॑ ॥१५॥
Asma idu tyadanu dayyeshameko yad vavne bhurerishanah
Praitasham surye paspridhanam sauvashvye sushvimavadindrah
35.16
ए॒वा ते॑ हारियोजना सुवृ॒क्तीन्द्र॒ ब्रह्मा॑णि॒ गोत॑मासो अक्रन्।
ऐषु॑ वि॒श्वपे॑शसं॒ धियं॑ धाः प्रा॒तर्म॒क्षू धि॒याव॑सु॒र्जगम्यात् ॥१६॥
Eva te hariyojana suvriktindra brahmani gotamaso akran
Aishu vishvapeshasam dhiyam dhah pratarmakshu dhiyavasurjagamyat