Sukta 135

135.1

Khilani

भुगि॑त्य॒भिग॑तः॒ शलि॑त्य॒पक्रा॑न्तः॒ फलि॑त्य॒भिष्ठि॑तः ।
दु॒न्दुभि॑माहनना॒भ्यां जरितरोथा॑मो दै॒व ॥१॥

Bhugityabhigatah shalityapakrantah phalityabhishthitah
Dundubhimahananabhyam jaritarothamo daiva

को॒श॒बिले॑ रजनि॒ ग्रन्थे॑र्धा॒नमु॒पानहि॑ पा॒दम्।
उत्त॑मां॒ जनि॑मां ज॒न्यानुत्त॑मां जनी॒न्वर्त्म॑न्यात् ॥२॥

Koshabile rajani grantherdhanamupanahi padam
Uttamam janimam janyanuttamam janinvartmanyat

अला॑बूनि पृ॒षात॑का॒न्यश्व॑त्थ॒पला॑शम्।
पिपी॑लिका॒वट॒श्वसो॑ वि॒द्युत्स्वाप॑र्णश॒फो गोश॒फो जरित॒रोऽथामो॑ दै॒व ॥३॥

Alabuni prishatakanyashvatthapalasham
Pipilikavatashvaso vidyutsvaparnashapho goshapho jaritarothamo daiva

वीमे दे॒वा अ॑क्रंस॒ताध्व॒र्यो क्षि॒प्रं प्र॒चर॑ ।
सु॒स॒त्यमिद्गवा॑म॒स्यसि॑ प्रखु॒दसि॑ ॥४॥

Vime deva akransatadhvaryo kshipram prachara
Susatyamidgavamasyasi prakhudasi

प॒त्नी यदृ॑श्यते प॒त्नी यक्ष्य॑माणा जरित॒रोऽथामो॑ दै॒व।
हो॒ता वि॑ष्टीमे॒न ज॑रित॒रोऽथामो॑ दै॒व ॥५॥

Patni yadrishyate patni yakshyamana jaritarothamo daiva
Hota vishtimena jaritarothamo daiva

आदि॑त्या ह जरितरङ्गि॑रोभ्यो॒ दक्षि॑णाम॒नय॑न्।
तां ह॑ जरितः॒ प्रत्या॑यं॒स्तामु ह॑ जरितः॒ प्रत्या॑यन् ॥६॥

Aditya ha jaritarangirobhyo dakshinamanayan
Tam ha jaritah pratyayanstamu ha jaritah pratyayan

तां ह॑ जरितर्नः॒ प्रत्य॑गृभ्णं॒स्तामु ह॑ जरितर्नः॒ प्रत्य॑गृभ्णः ।
अहा॑नेतरसं न॒ वि चे॒तना॑नि य॒ज्ञानेत॑रसं न॒ पुरो॒गवा॑मः ॥७॥

Tam ha jaritarnah pratyagribhnanstamu ha jaritarnah pratyagribhnah
Ahanetarasam na vi chetanani yagyanetarasam na purogavamah

उ॒त श्वेत॒ आशु॑पत्वा उ॒तो पद्या॑भि॒र्यवि॑ष्ठः ।
उ॒तेमाशु॒ मानं॑ पिपर्ति ॥८॥

Uta shveta ashupatva uto padyabhiryavishthah
Utemashu manam piparti

आदि॑त्या रु॒द्रा वस॑व॒स्त्वेनु॑ त इ॒दं राधः॒ प्रति॑ गृभ्णीह्यङ्गिरः ।
इ॒दं राधो॑ वि॒भु प्रभु॑ इ॒दं राधो॑ बृ॒हत्पृथु॑ ॥९॥

Aditya rudra vasavastvenu ta idam radhah prati gribhnihyangirah
Idam radho vibhu prabhu idam radho brihatprithu

देवा॑ दद॒त्वासु॑रं॒ तद्वो॑ अस्तु॒ सुचे॑तनम्।
युष्मां॑ अस्तु॒ दिवे॑दिवे प्र॒त्येव॑ गृभायत् ॥१०॥

Deva dadatvasuram tadvo astu suchetanam
Yushmam astu divedive pratyeva gribhayat

त्वमि॑न्द्र श॒र्मरि॑णा ह॒व्यं पारा॑वतेभ्यः ।
विप्रा॑य स्तुव॒ते व॑सु॒वनिं॑ दुरश्रव॒से व॑ह ॥११॥

Tvamindra sharmarina havyam paravatebhyah
Vipraya stuvate vasuvanim durashravase vaha

त्वमि॑न्द्र क॒पोता॑य च्छिन्नप॒क्षाय॒ वञ्च॑ते ।
श्यामा॑कं प॒क्वं पीलु॑ च॒ वार॑स्मा॒ अकृ॑णोर्ब॒हुः ॥१२॥

Tvamindra kapotaya chchhinnapakshaya vanchate
Shyamakam pakvam pilu cha varasma akrinorbahuh

अ॒रं॒ग॒रो वा॑वदीति त्रे॒धा ब॒द्धो व॑र॒त्रया॑ ।
इरा॑मह॒ प्रशं॑स॒त्यनि॑रा॒मप॑ सेधति ॥१३॥

Arangaro vavaditi tredha baddho varatraya
Iramaha prashansatyaniramapa sedhati