Sukta 105

105.1

त्वमि॑न्द्र॒ प्रतू॑र्तिष्व॒भि विश्वा॑ असि॒ स्पृधः॑ ।
अ॒शस्ति॒हा ज॑नि॒ता वि॑श्व॒तूर॑सि॒ त्वं तू॑र्य तरुष्य॒तः ॥१॥

Tvamindra praturtishvabhi vishva asi spridhah
Ashastiha janita vishvaturasi tvam turya tarushyatah

अनु॑ ते॒ शुष्मं॑ तु॒रय॑न्तमीयतुः क्षो॒णी शिशुं॒ न मा॒तरा॑ ।
विश्वा॑स्ते॒ स्पृधः॑ श्नथयन्त म॒न्यवे॑ वृत्रं यदि॑न्द्र॒ तूर्व॑सि ॥२॥

Anu te shushmam turayantamiyatuh kshoni shishum na matara
Vishvaste spridhah shnathayanta manyave vritram yadindra turvasi

इ॒त ऊ॒ती वो॑ अ॒जरं॑ प्रहे॒तार॒मप्र॑हितम्।
आ॒शुं जेता॑रं॒ हेता॑रं रथीत॑म॒मतू॑र्तं तुग्र्या॒वृध॑म् ॥३॥

Ita uti vo ajaram prahetaramaprahitam
Ashum jetaram hetaram rathitamamaturtam tugryavridham

यो राजा॑ चर्षणी॒नां याता॒ रथे॑भि॒रध्रि॑गुः ।
विश्वा॑सां तरु॒ता पृत॑नानां॒ ज्येष्ठो॒ यो वृ॑त्र॒हा गृ॒णे ॥४॥

Yo raja charshaninam yata rathebhiradhriguh
Vishvasam taruta pritananam jyeshtho yo vritraha grine

इन्द्रं॒ तं शु॑म्भ पुरुहन्म॒न्नव॑से॒ यस्य॑ द्वि॒ता वि॑ध॒र्तरि॑ ।
हस्ता॑य॒ वज्रः॒ प्रति॑ धायि दर्श॒तो म॒हो दि॒वे न सूर्यः॑ ॥५॥

Indram tam shumbha puruhanmannavase yasya dvita vidhartari
Hastaya vajrah prati dhayi darshato maho dive na suryah